mendittonttor

Jakingo duzuenez, astebukaera honetako igandean, Saioa mendira ibilaldia egiteko asmoa genuen Jakintza Ikastolako mendizaleok. Baina eguraldiak ez zuen asko lagundu, eguraldi kaxkarra izan bai genuen. Denbora puska bat autobusean jendearen zain egon ondoren, Urbasara joatea erabaki genuen, Saioa alde batera utziz. Handik Urederrarako bidea egin genuen, eta autobusera itzultzerako, primerako eguraldia zegoen. Ondoren kanping batera joan ginen eta korrika itzuli behar izan genuen, berriro eguraldiak txarrera egin zuelako. Ikusten duzuenez, alde batera eta bestera ibili ginen eguraldiarengatik, baina ondo pasa genuen.

Azkenaldi honetan, zer idatzi jakin ezinik nebila, oso blog edo web orri interesgarri bat topatu dut (Gipuzkoako Mendi Ibilaldiak). Bertan, gipuzkoan egin daitezken ibilaldiei buruz informazio interesgarria ematen da eta egia esan, harriturik nago nola den posible gure inguruan horrenbeste bide izateaz. Gainera, ez bakarrik ibilbide motzak, luzeak ere aurkitzen dira.

Kokapena

Belateko mendatetik gertu dagoen mendi honen magaletan isurtzen diren urak Anue, Esteribar, Baztan eta Ultzamako haranetan barna abiatzen dute Kantauri eta Mediterraneo itsasoetan amaituko duten bidea.
Tontorretik ekialdera begira jarri ez gero, Pirineoak izango ditugu begi bistan. Ori mendia gertuen eta aruntzago Auñamendi edo Anie eta Hiru Erregeen Mahaia. Mendebaldera berriz, Aralarko mailoak eta Beriain ikusiko ditugu, hegoaldera, Iruñako sakana eta iparraldera Baztan eta Behe Nafarroa.

Jakintzako Txangoa

Ekainak 10ean, goizean garaiz hartuko dugu Belatera eramango gaituen autobusa. Ibilbidea zeharka-zeharka eta poliki-poliki altuera hartuz eta XII. mendeko monasterio baten gainaldetik pasatuz pagadi eder batean sartzen da.

Belateko monasterio zaharra.

Bideak errekarekin bat egiten duenean, gogor heltzen dio aldapari.

Ur hauek Mediterraneo itsasoan amaituko dute beren bidaia.

Txabola zahar baten ondoan pasatuko gara eta basoa atzean utziko dugu.

Hemendik aurrera, Gartzagako leporaino (1.230m) eramango gaituen bidezidorra jarraitu besterik ez dugu izango. Bertan, Baztango bailara zabalduko zaigu begien aurrean. Lepoa jarraituz, nahi izan ez gero, Okolin tontorrera igoko gara edo hegaletik jarraituz izen bereko lepora iritsiko gara. Hemendik Saioa mendiaren gailurra (1.418m) eskura izango dugu.

Okolingo lepoko bidean Saioa aurrean dugu.

Itzuleran, toki egokiren bat hautatu ondoren, patxadan bazkalduko dugu, beraz, ez ahaztu bakoitzak bere bazkaria eraman behar duela.

On egin!!

Denbora eman ez gero…

…arratsaldean, Lantz herria bisitatuko dugu. Han ote dabil oraindik Miel Otxin?

Eta eguraldi txarra egiten badu?

Ez kezkatu, inguruetako herriek aukera polita ematen digute eguna pasatzeko.

Argibide gehiago nahi baduzu:

• Klikatu hemen.
• Behera joan ez gero, koadrotxo batzuk aurkituko dituzu. Lehenengo laukian, zure izena idatzi. Bigarrenean, helbide elektronikoa (baldin baduzu). Eta azkenekoan, zure iruzkina edo galdera idatzi. Ondoren, sakatu BIDALI!!
• Ahal den azkarren erantzungo dizut zure helbidera edo hemen.

Urnieta eta Andoain herrien gainean aurkitzen da mendi hau. Jakintza Ikastolatik talde polita bildu ginen bertara joateko. Egia esan, eguraldi zoragarriaz gozatzeko aukera izan genuen.

Honela dio hurrengo Jakintza Ikastolako mendi-irteera orriak:

“Urtero, udaberri atarian, Ordiziako Mendizale elkartekoak ibilaldi bat prestatzen dute gure herriaren inguruan gaztetxo eta gurasoentzat. Ohitura galdu gabe aurten ere parte hartzea gonbidatu gaituzte. Zortzi eta erdietan Herriko Plaza Nagusitik abiatuko gara eta Ioiatik pasatuz Urkira joango gara. Bertan guztiontzat hamaiketakoa zain izango dugu eta eguerdiko ordu bata ingururako etxera itzuliko gara. Parte hartzeko ezin bestekoa izango da aurretik izena ematea.
Oharra: Egun berean, Jakintza Ikastolako mendi irteeratara joaten garenak bazkari bat antolatu dugu Ordiziako elkarte batean. Hogeita hamasei lagunentzat dugu tokia, beraz, parte hartu nahi duzuenak, eman izena lehenbailehen liburutegiko Blas-eri. (943085635)”

Egia esan, ez dut uste Ordiziako ibilaldia deitu beharko geniokeenik, izan ere, herriaren lurrak hain txikiak izanik, lau pauso eman eta bertatik kanpo aurkitzen gara. Jabetuko zineten ibilaldi hau gehienbat Itsasondoko lurretan egingo dugula.

Iazko Ordiziako ibilaldiaren irudi bat Lazkaoko lurretan.

Aurreko igandean, hilak 11, mendi-irteera izan genuen Eskolarteko Mendi Txapelketa barruan. Aurtengoa Ataunen ospatua izan da. Ordiziako Jakintza Ikastolatik talde polit batek hartu genuen parte. Oso ibilaldi polita antolatu zuten Ataundarrek, agian luze samarra kontutan izanda azkenaldi honetan Ikastolako gaztetxoak direla mendi-irteeretan gehien parte hartzen dutenak. Zorionak 1. eta 2. mailako ikasleei.

Ataun, San Gregorio auzoan loratu dira elorriak.

Jakintzako gaztetxoak sasoian daude.

Astebukaera hau, besteak baino bereziagoa izan da, izan ere, lagun batzuekin Frantziako mugan izan ginen eskiatzen. Lehenengo egunean, Somport izeneko eski-pista batean izan ginen fondo egiten eta bertan primeran pasa genuen. Bazkaria han jan genuen eta arratsean ere eskien gainean jarri eta han ibili ginen jolasean. Hala ere, ez genuen arratsalde guzia eskiatzen pasa, Canfranc herrira ere joan ginen, bertan oso ezaguna den tren-geltokia ikustera. Gauean, Jacara joan ginen lo egitera eta bertako jatetxe batera afaltzera.
Hurrengo egunean, beste ekintza batzuk genituen egiteko esku-artean, etxera itzultzea adibidez. Hala ere, beste zerbait egin beharko genuen, ezta? Lasai, eguna borobila atera bait zitzaigun. Gosaldu eta herrian buelta bat eman ondoren, bakoitzaren autoan “San Juan De La Peña”-ko monasterioa ikustera joan ginen. Oso polita zen eta oso ondo pasa genuen. Bertan bazkaldu, berriz autoa hartu eta han abiatu ginen, oraingoan, Arbaiungo arroila ikustera. Hemen ikus ditzakezue bai monasterio hartan eta baita Arbaiungo arroilan ere atera nituen argazkiak.

Hau Arbaiungo arroila da.

Hemen berriz, San Juan de la Peñako monasterio barruko bi argazkiak ikus daitezke.

Arroila, jakin dezazuen, bi mendiren arteko pasarteari deitzen zaio eta gehienetan, tartean, erreka bat joaten da.

…berarekin jolasean pasatzen dugu denbora, begira egoten gara nola lurrean itsasten den ikusiz  eta egia  esan, oso ondo pasatzen dugu berarekin. Baina, gauza honak bezala, bere gauza txarrak ere baditu elurrak. Errepidean asko itsasten bada, istripuak sor ditzake eta batzuentzat atsekabe handiak. Gainera, horrenbeste elur egitean, eski pistak ireki eta denok joaten gara bertara eskiatzera,ondo pasatzera,baina oraingoan bezala urtarrila bukaerara arte elurrik gabe egon ez gero,behin irekitzean gainezka egongo dira aipatutako pista horiek. Nire ustez,elurraz gozatzeko onena, mendian egitea da eta herrian egitekotan, piska bat bakarrik, bestela, batzuk nahiko gaizki pasatzen dute gainontzekoek botatako elur bolekin. Lehen esan bezala, onena mendian egitea da.

Aste honetako igandean (2006.eko azaroak 26-ean), ibilaldi polit bat dugu Jakintza Ikastolako Mendi taldearekin, Sagastarriko kobara.

Abiapuntu, Urkilagako lepoa izango dugu Ataungo Aia auzoan. Bertan, Lareoko urtegira doan pista alde batera utzi eta Agaozko gainera doan bidea hartuko dugu. Aldapa gogorrak izerdia atera araziko digu, baina eguraldia lagun, goian izango dugu geure saria, izan ere, bertako bistak zoragarriak dira. Zeharka-zeharka jarraituz, Sastarriko basoan, kobazulorako bidea bilatu beharko dugu. Zuloaren zirrikituak ikusten ordubete bat pasa ondoren, sarreran bertan merezitako hamaiketakoa egingo dugu. Ondoren, Lareoko urtegitik pasatuz Akerretako bidetik Lizarrustira jaitsiko gara. Aspaldi, garraio tren txiki batek egiten zuen bidetik.

Lizarrustin zain izango dugu etxera itzuliko gaituen autobusa.

Kaixo denoi:

Ongi etorri blog honetara.

Blog honetan mendiei buruzko informazioa emango dizuet eta batzuetan txango batzuk egiteko ideiak ere bai.

Zuen gustokoa izatea espero dut.

Besterik gabe:

Irati